Ru
Bakı
USD
EUR
GBP
RUB

Bilik Fondu Goranboy və Xocalı sakinləri ilə maarifləndirici görüşlər keçirib

news photo

16.10.2018 16:41 // Cəmiyyət

Azərbaycan Respublikasının Prezidenti yanında Bilik Fondu tərəfindən Goranboyda maarifləndirmə tədbirləri keçirilib.

Fonddan Youthportal.az-a bildiriblər ki, Goranboy Gənclər Mərkəzində keçirilən görüşdə Azərbaycan Xalq Cümhuriyyətinin dil siyasəti, “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nın icrası ilə bağlı görülən işlər barədə məruzələr dinlənilib.

Tədbirdə icra hakimiyyətinin, təhsil, mədəniyyət, gənclər təşkilatlarının, qeyri-hökumət təşkilatlarının nümayəndələri çıxış ediblər. Çıxışlarda Prezident İlham Əliyevin son on ildə Goranboya səfərlərinin, rayonun sosial-iqtisadi inkişafının sürətləndirilməsi ilə bağlı sərəncamların bölgənin simasını başdan-başa dəyişməsinə, işsizliyin tam aradan qaldırılmasına imkan yaratdığı qeyd edilib. Həmçinin dövlətimizin başçısının müvafiq Sərəncamı ilə 2018-ci ilin ölkəmizdə “Azərbaycan Xalq Cümhuriyyəti İli” elan edilməsi tarixi keçmişimizə hörmət və ehtiramın, işıqlı gələcəyimizə aydın münasibətin təzahürü olduğu bildirilib. Tədbirdə ana dilimizin saflığının qorunub saxlanması və inkişaf etdirilməsi sahəsində dövlətimizin apardığı dil siyasətinin gerçəkləşməsi üçün KİV-lərin, ictimaiyyətin, hər bir vətəndaşın məsuliyyəti, rolu və vəzifələrindən söz açılıb.

Görüşlərdə ictimaiyyət nümayəndələrinin sualları cavablandırılıb.

Rayonun Rəhimli kənd tam orta məktəbində təşkil olunan görüşdə Bilik Fondunun Goranboy rayonu üzrə nümayəndəsi Günay Tağıyeva “Maarifçilik işi: ailə, məktəb və ictimaiyyətin birgə fəaliyyətinin təşkili” və Hacı Abdulla “Sərhəd bölgələrində hərbi informasiya təhlükəsizliyinin qorunması” mövzularında çıxış ediblər. Çıxışlarda 2016-cı ilin Aprel döyüşlərindən sonra sərhəd bölgələrində yaşayan əhalinin sayıqlığının, hərbi sirlərin mühafizəsində məsuliyyətinin yüksəldiyi, biliklərinin genişləndiyi bildirilib. Bu istiqamətdə Ali Baş Komandanın imzaladığı sənədlərin mühüm rolu olduğu vurğulanıb. Məktəb və ictimaiyyətin, şagirdlərin öhdəsinə düşən vəzifələr barədə fikir mübadiləsi aparılıb.

Goranboy rayonu Aşağı Ağcakənd qəsəbəsində yerləşən Xocalı rayon Mədəniyyət evində keçirilən tədbirdə ermənilərin törətdikləri soyqırımının ağır fiziki, mənəvi müsibətlərini yaşamış xocalıların maddi, sosial təminatının yaxşılaşdırılması istiqamətində görülən işlərdən söz açılıb. Xocalı Rayon İcra Hakimiyyəti başçısının müavini Vahid Əliyev sərhədyanı bölgədə Bilik Fondu tərəfindən bu cür maarifləndirici tədbirlərin keçirilməsini yüksək qiymətləndirib.

AMEA Nəsimi adına Dilçilik İnstitutunun direktoru, akademik Möhsün Nağısoylu dilimizin tarixi, inkişaf mərhələləri, indiki vəziyyəti, ümummilli lider Heydər Əliyevin və Prezident İlham Əliyevin rəhbərliyi ilə həyata keçirilən dövlət dil siyasəti, dilimizin tədrisi, təbliği istiqamətində görülən işlər barədə məlumat verib. Akademik Bilik Fondu ilə Dilçilik İnstitutunun birgə həyata keçirdiyi tədbirlərdən də söz açıb.

Meşəli kənd tam orta məktəbinin direktoru Alış Alışov və tarixçi müəllim Sabir Qasımov ziyalılarla bu cür görüşlərin keçirilməsinin vacibliyini vurğulayıblar.

Goranboyda fəaliyyətini davam etdirən Xocalı şəhər 1 nömrəli tam orta məktəbdə təşkil edilən “dəyirmi masa”da oktyabrın 9-da Azərbaycan Respublikasının Prezidenti İlham Əliyevin Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında məcburi köçkünlərin problemləri ilə əlaqədar verdiyi tapşırıqların bu sahədə mövcud olan nöqsan və çatışmazlıqların aradan qaldırılmasına yeni stimul verəcəyinə inam ifadə olunub.

Bilik Fondunun sektor müdiri Hacı Abdulla, məktəbin direktoru Vidadi Rəhimov, Xocalı şəhəri üzrə icra nümayəndəsi Tacir Əzizov, Əməkdar müəllim Tamella Bilalova və digər çıxış edənlər köçkünlərə diqqət və qayğının Prezident İlham Əliyevin siyasi kursunun əsas istiqamətlərindən biri olduğunu vurğulayıblar. Çıxışlarda Xocalıya qayıdışın xocalıların həyat devizi, gündəlik yaşam arzusu olduğu bildirilib, məcburi köçkünlərin gələcəyə inam əhval-ruhiyyəsinin qorunub saxlanmasında təbliğat, təşviqat, maarifçilik işinin xüsusi önəm daşıdığı vurğulanıb.

Görüşdə iyirmi yeddi ildir fəaliyyətini davam etdirən məktəbin qazandığı uğurlardan da söz açılıb. Bildirilib ki, ötən dərs ilində məktəbin on məzunu yüksək balla ölkənin müxtəlif ali məktəblərinə qəbul olunublar.

Bilik Fondunun Goranboy, Xocalı, Naftalan, Gəncə nümayəndələrinin “İlboyu bilik”, “Qardaşlaşmış məktəblər” layihələri çərçivəsində birgə tədbirlərin – müsabiqə, ekskursiya, bilik yarışmalarının, səngərdə əldə silah Vətənin keşiyində duran əsgərlərlə görüşlərinin hazırlanıb, həyata keçirilməsi barədə təşəbbüslərinə Bilik Fondu tərəfindən təşkilati, maddi-mənəvi dəstək veriləcəyi bildirilib.

H.Abdullanın Xocalı məktəbində keçdiyi “Vətən dərsi”ndə şagirdlərə Azərbaycan Xalq Cümhuriyyətinin tarixi və qurucuları, dövlət atributlarımız, ulu öndər Heydər Əliyevin həyatı, Xocalının tarixi, Milli qəhrəmanları, Milli Ordumuzun Aprel döyüşlərində qazandığı zəfərlə bağlı məlumat verilib.

news photo

Digər xəbərlər

Xəbər lenti

Sabah Bakıda hava yağmursuz olacaq

Bizə qoşulun

facebook
facebook
facebook
Gənclər Paytaxtı
Salto Youth
Tehsil Nazirliyi